पोखरामा वैकल्पिक मैदान बनाउन पहल !!

वैशाख २ - पोखरा रंगशालामा क्रिकेट मैदान छ । तर,मापदण्डअनुसारको पूर्वाधारमा अझै पूर्ण हुन सकेको छैन । चेन्जिङ रुम, शौचालय र मैदानको माटो कमसल भएकालेप्रतियोगिता गर्न समेत कठिन भएको प्राविधिक टोलीले बताउँदै आएका छन् । क्रिकेटको अन्तर्राष्ट्रिय प्रतियोगिता एकै सहरमा आयोजना गर्न दुई मैदान अनिवार्यजस्तै छ । त्यसैले यहाँ वैकल्पिक मैदान नभएकै कारण अन्तर्राष्ट्रिय प्रतियोगिता हुन सकेको छैन । यही आवश्यकतालाई पूरा गर्न यहाँ क्रिकेटकोवैकल्पिक मैदान निर्माणका लागि पहल सुरु भएको छ । लेखनाथ नगरपालिका १७ को भरतपोखरी पशुपतिघाटमा अवस्थित २ सय रोपनी जग्गा मैदानका लागि उपयुक्त भन्दैनिर्माणका लागि अध्ययन सुरु भएको हो । क्षेत्रीय प्रशासक दिनेश थपलिया, प्रमुख जिल्ला अधिकारी कृष्णबहादुर राउतसहित खेलकुदसम्बन्धी संघसंस्थाले जग्गा अवलोकन गरी स्थानीयवासीसँग राय संकलन गरिसकेका छन् । यसका लागि भरतपोखरीवासीसमेत सार्वजनिक जग्गा क्रिकेट मैदानलाई दिन सहमत भएको निर्माण समिति संयोजक अशोक पालिखेले बताए । 'यो जग्गा वैकल्पिक मैदानका लागि उपयुक्त देखिएको छ । रिङरोडभित्रै पर्छ,' उनले भने, 'तारबार गरेर तीन-चार वर्षभित्रमा निर्माण पूरा गर्ने लक्ष्य लिएका छौ ।' उनले मैदान निर्माणपछि राष्ट्रिय तथा अन्तर्राष्ट्रिय प्रतियोगिता गर्न पनि सहज हुने बताए । हेमजा, जनताको चौतारो लगायतका ठाउँहरूमा जग्गा हेरिए पनि यो ठाउँलाई टोलीले उपयुक्त ठानेको हो ।

स्थानीयवासी पनि मैदानका लागि जग्गा सहज रूपमा दिन तयार भएका छन् । गत माघमा क्षेत्रीय प्रशासकले सारेको पोखराका १४ वटा गौरवका योजनामा अन्तर्राष्ट्रिय क्रिकेट मैदान निर्माणलाई पनि प्राथमिकतामा राखिएको हो । 'दुई मैदान नभएकै कारण सम्भावना भएर पनि यहाँ क्रिकेटको अन्तर्राष्ट्रिय प्रतियोगिता हुन सकेको छैन,' जिल्ला क्रिकेट संघका सचिव संजयकान्त सिग्देलले भने । रंगशालाभित्र रहेको एउटा मैदानमा राष्ट्रिय प्रतियोगिता गर्न महिनौं दिन लाग्ने उनले बताए ।, 'कमसेकम अकोर्े मैदान हुने हो भने छोटो अवधि र खर्च पनि कटौती गर्न सकिन्छ' उनले भने । उनका अनुसार वैकल्पिक मैदान भएका खण्डमा पोखरालाई क्रिकेटको अन्तर्राष्ट्रिय 'भेन्यु' का रूपमा समेत विकास गर्न सकिन्छ । वैकल्पिक मैदान निर्माण भएपछिक्रिकेटको अन्तर्राष्ट्रिय गतिविधि बढाउन पनि सहज हुने खेलप्रेमीले बताएका छन् । अहिले जति पनि क्रिकेटका प्रतियोगिता काठमाडांै केन्दि्रत भएकाले पनि बाहिर पोखरा नै उपयुक्त देखिएको हो ।  'रंगशालाभित्र भएको पनि त्यति व्यवस्थित छैन,वैकल्पिक भए काठमाडांैपछि अन्तर्राष्ट्रिय प्रतियोगिता पोखरामा सजिलै गर्न सकिन्छ,' राष्ट्रिय क्रिकेट संघ (क्यान) कार्यवाहक अध्यक्ष दीपक कोइरालाले भने, 'दुई मैदान भए भने प्रशिक्षणका लागि पनि सजिलो हुनेछ ।' उनका अनुसार मैदान निर्माणका लागि क्यानले बजेटका लागि आवश्यक पहल गर्नेछ । पोखरा रंगशालाभित्र रहेको अन्तर्राष्ट्रिय क्रिकेट मैदान २०५६ सालबाट निर्माण सुरु भई २०६८ बाट निर्माण पूरा भई प्रतियोगिता हुन थालेको हो ।